కోల్‌కతా వైద్యురాలి హత్యాచార ఘటన: సుప్రీం కోర్టు సుమోటోగా విచారణ చేపట్టింది
వెస్ట్ బెంగాల్ రాజధాని కోల్కతాలో జూనియర్ వైద్యురాలి పై జరిగిన హత్యాచార కేసును సుప్రీం కోర్టు స్వతంత్రంగా (Suo Moto) స్వీకరించి, మంగళవారం విచారణ ప్రారంభించింది.
ఈ విచారణలో బెంగాల్ ప్రభుత్వము, కోల్కత్తా పోలీసులు, మరియు కాలేజి అధికారుల తీరుపై సుప్రీం కోర్టు తీవ్రమైన అసంతృప్తి మరియు ఆగ్రహం వ్యక్తం చేసింది. వైద్యురాలి మరణాన్ని ఆత్మహత్యగా చిత్రీకరించడానికి మెడికల్ కాలేజి ప్రిన్సిపల్ చేసిన ప్రయత్నంపై సుప్రీం కోర్టు ధర్మాసనం, డీవై చంద్రచుద్ నేతృత్వంలో, గంభీరంగా స్పందించింది.
శవపరీక్ష మధ్యాహ్నం 1.45 గంటలకు పూర్తయినప్పటికీ, ఎఫ్ఐఆర్ రాత్రి 11.45 గంటలకు మాత్రమే నమోదు చేయడంపై సుప్రీం కోర్టు సందేహాలు వ్యక్తం చేసింది. ఈ సమయం వరకు అధికారులు మరియు కోల్కత్తా పోలీసులు ఏమి చేస్తున్నారని కోర్టు ప్రశ్నించింది. అదే విధంగా, తల్లిదండ్రులు మృతదేహాన్ని చూడటానికి గంటల తరబడి ఎదురుచూడవలసిన పరిస్థితిని సృష్టించడం పట్ల కోర్టు తీవ్రంగా ప్రశ్నించింది.
ఈ కేసు విచారణ సందర్భంగా, సుప్రీం కోర్టు పశ్చిమ్ బెంగాల్ ప్రభుత్వము, పోలీసులు, మరియు ఆర్‌జీ కార్‌ మెడికల్ కాలేజీ మాజీ ప్రిన్సిపల్ తీరుపై ఆగ్రహం వ్యక్తం చేసింది. ఆసుపత్రిలో జరిగిన ఈ దారుణ ఘటనను ఆత్మహత్యగా ప్రకటించడం తగదని, దీనిపై ప్రిన్సిపల్ పై మండిపడింది.
ఈ కేసులో పోలీసుల తీరును కూడా సుప్రీం కోర్టు తప్పుబట్టింది, ఎఫ్ఐఆర్ నమోదు ఆలస్యమైందని వ్యాఖ్యానించింది. పని ప్రదేశంలో మహిళల భద్రత కోసం జాతీయ స్థాయి ప్రోటోకాల్‌ను రూపొందించడం అత్యవసరమని ధర్మాసనం పేర్కొంది.
దీని కోసం సుప్రీం కోర్టు ఒక జాతీయ టాస్క్ ఫోర్స్‌ను ఏర్పాటు చేసింది. ఈ టాస్క్ ఫోర్స్‌లో, హైదరాబాదుకు చెందిన ఏషియన్ ఇనిస్టిట్యూట్ ఆఫ్ నేషనల్ గ్యాస్ట్రాలజీ మేనేజింగ్ డైరెక్టర్ డాక్టర్ నాగేశ్వర్ రెడ్డి, సర్జన్ వైస్ అడ్మిరల్ ఆరే సరిన్ వంటి ప్రముఖులు సభ్యులుగా ఉంటారని పేర్కొంది. భవిష్యత్తులో ఇలాంటి సంఘటనలు పునరావృతం కాకుండా తగు చర్యలు తీసుకోవాల్సిన అవసరం ఉందని సుప్రీం కోర్టు స్పష్టం చేసింది.
0 కామెంట్‌లు